کرونا وائرس کو پھیلنے سے روکنے کے لیے مساجد میں نمازوں کی ادائیگی پر عائد کی گئی پابندی کو برقرار رکھنے کا اعلان
اردن (اُردو پوائنٹ اخبارتازہ ترین۔ 15 اپریل2020ء) سعودی عرب کے بعد ایک اور عرب اسلامی ملک نے رمضان المبارک کے دوران نماز تراویح پر پابندی عائد کر دی، کرونا وائرس کو پھیلنے سے روکنے کے لیے مساجد میں نمازوں کی ادائیگی پر عائد کی گئی پابندی کو برقرار رکھنے کا اعلان۔ تفصیلات کے مطابق اردن کی حکومت نے کرونا وائرس کو پھیلنے سے روکنے کے لیے رمضان المبارک کے دوران میں بھی مساجد میں نمازوں کی ادائیگی پر پابندی برقرار رکھنے کا فیصلہ کیا ہے۔
بتایا گیا ہے کہ اردنی حکومت کے ترجمان امجد عدیلہ نے ایک بیان میں کہا کہ وزیراعظم عمرالرزاز نے لاک ڈائون اور مساجد میں نمازوں کی ادائیگی پر پابندی کا فیصلہ کرونا وائرس کی وبا کے تعلق سے ہونے والی پیش رفت اور سفارشات کی روشنی میں کیا ہے۔
سعودی عرب کی وزارت مذہبی امور نے اعلان کیا تھا کہ کرونا وائرس کی وجہ سے اس سال رمضان المبارک کے دوران سعودی عرب کی مساجد میں نماز تراویح کی ادائیگی کی اجازت نہیں دی جائے گی۔ لوگوں کو نماز تراویح گھروں میں ادا کرنے کا حکم دیا گیا ہے۔ جبکہ یہاں واضح رہے کہ کرونا وائرس کی وبا پھیلنے کے بعد سے بیشتر اسلامی ممالک میں مساجد میں نماز کی ادائیگی پر پابندی عائد ہے۔
کرونا وائرس کی وبا پھیلنے کے بعد مسلمانوں کے 2 سب سے مقدس ترین شہروں مکہ مکرمہ اور مدینہ منورہ بھی اس وقت لاک ڈاون کی حالت میں ہیں۔ دونوں شہروں میں اس وقت کرفیو نافذ ہے۔ عمرہ ادائیگی کا عمل بھی تعطل کا شکار ہے، جبکہ رمضان المبارک کے دوران عمرہ ویزے جاری نہ کرنے کا اعلان کیا ہے۔ رواں برس حج کے حوالے سے بھی تاحال کوئی حتمی فیصلہ نہیں کیا جا سکا۔ بتایا جا رہا ہے کہ رمضان المبارک کے ماہ میں فیصلہ کیا جائے گا کہ آیا رواں برس حج کا انعقاد ممکن ہے یا نہیں۔
اس سے قبل کرونا وائرس کی وجہ سے سعودی عرب کی مساجد میں نماز تراویح کی ادائیگی پر پابندی کا اعلان کیا گیا تھا۔
Comments
Post a Comment